Samkynhneigðir og kirkjan

Skil ekki þessi gömlu gildi kirkjunnar:

Tillagan um að prestar fengju heimild til að vígja samkynhneigða í hjónaband var felld með 64 atkvæðum gegn 22 en ríflega 40 prestar og guðfræðingar lögðu hana til. Þá var málamiðlunartillögu um að prestar fengju heimild til að vígja samvist samkynhneigðra án þess að um hjónaband væri að ræða, vísað frá.

Prestastefnan samþykkti hins vegar álit kenninganefndar um að prestar fái heimild til að staðfesta samvist samkynhneigðra með blessun og segir Karl Sigurbjörnsson biskup álitið ganga út á að kirkjan beri virðingu fyrir ólíkum sjónarmiðum í þessu máli

Biskup segir það vera löggjafans í landinu að ákveða skilyrði til hjúskapar, verði breytingar þar á taki kirkjan á því. Hann segir þetta vera stórt skref, nú sé íslenska kirkjan meðal þeirra kirkna sem lengst ganga í þessum málum.

Hvernig væri að krikjan færi að bera virðingu fyrir fólki eins og samkynhneigðum? Ég vona að komandi ríkisstjórn, hverjir sem koma til með að sitja í henni, átti sig á þeim sjálfssögðu mannréttindum sem felast í hjónavígslu samkynhneigðra.

Góða helgi :)

Athugasemdir

[Ólafur Jóhann Borgþórsson, 27.4.2007 kl. 21:50]

Sæl Kristín María.
Umræðan hefur verið heldur neikvæð undanfarna daga í garð kirkjunnar og kirkjunnar manna, jafnvel þó með þessari ákvörðun hafi verið samþykkt að íslenska þjóðkirkjan tæki stórt skref í átt að réttindum samkynhneigðra innan kirkjunnar og er þar með orðin næst frjálslyndasta kirkjan í Evrópu í þessum málum.

Góðir hlutir gerast hægt og á þennan hátt er reynt að sætta andstæða sjónarmið innan kirkjunnar, bæði hjá lærðum og leikum - þarna er ekki settur punktur fyrir aftan umræðuna heldur komma og málið hefur ekki verið útrætt að eilífu.

[Kristín María , 27.4.2007 kl. 22:56]

Takk fyrir þetta komment Ólafur. Ég átta mig á því að góðir hlutir gerast hægt og ég veit að í framtíðinni munum við líta til baka....til þessa tíma og skammast okkar. Og það er gott að andstæð sjónarmið kirkjunnar sé reynt að sætta. En þegar menn eru að vitna bókstaflega í Biblíuna fussa ég....ég er í þjóðkrikjunni, trúi á Guð, var skírð, fermd og hef hugsað mér að gifta mig í kirkju, en mér finnst ekki hægt að lifa eftir 2000 ára gömlum gildum....bókstaflega. Bara sorry. 

[Ólafur Jóhann Borgþórsson, 27.4.2007 kl. 23:32]

Sæl á ný!

Ekkert að fyrirgefa :) - enda nauðsynlegt að ræða málin á málefnalegan hátt! 

Já Biblían er raunar trúarrit kristinna manna og erfitt fyrir kristna kirkju að ætla að fara á svig við orð Krists - þá hefur kirkjan alveg tapað tilgangi sínum! Því sérstaða hennar felst einmitt í þeim þætti!

Hins vegar er ég alveg sammála þér í því að auðvitað getum við ekki látið eins og Biblían sé skrifuð í dag inn í aðstæður vesturlandabúa. Við verðum að vera mjög meðvituð um það að Biblían er skrifuð inn í ákveðið menningarlegt samhengi á ákveðnum tíma og í því ljósi ber að skoða Biblíuna, við getum ekki tekið einhverja ritningartexta um ákveðnar aðstæður og skellt þeim inn í íslenskar aðstæður 2007 - þess vegna er mjög mikilvægt að skoða biblíutextana fræðilega og átta sig á upphaflegri merkingu, sem hefur verið gert og það er gaman að segja frá því að í Biblíunni er alls ekki að finna neina andstöðu við samkynhneigð eins og við þekkjum hana í dag - gagnkvæma ást milli tveggja einstaklinga!

Það er því í raun ekki á því sem málið strandar, heldur er fyrst og fremst um mikið tilfinningamál að ræða, og þá er það mín trú að best sé að fara fetið hægt fram á við og ég er ekki í nokkrum vafa um að innan nokkurra ára verða jöfn réttindi samkynhneigðra og gagnkynhneigðra hér á land. Enda þetta mál mikið tilfinningamál og því getur verið mjög erfitt að sætta andstæð sjónarmið - ef farið er hratt í aðra hvora áttina - verða alltaf einhverjir svekktir, súrir og reiðir!

Sjálfur hefði ég reyndar viljað að við hefðum nú gengið skrefi lengra og gert blessun samkynhneigðra para að löggjörningi og væri kirkjan þá komin lengst af öllum kirkjum og kirkjudeildum í Evrópu í þessum málum - en það gekk ekki í þetta skipti en vonandi að það fái framgang næst.

Með hlýjum kveðjum, Ólafur Jóhann.

[Kristín María , 28.4.2007 kl. 21:33]

já ég er sammála því. Það ætti að gera strax og gera öðrum trúfélögum jafn hátt undir höfði.

[Ólafur Jóhann Borgþórsson, 29.4.2007 kl. 01:16]

Það er sjónarmið útaf fyrir sgi, en tengist þessari umræður ekki á nokkurn hátt!

[Guðlaugur Kristmundsson, 9.5.2007 kl. 00:08]

Mér er alveg sama hvort kirkjan vill gifta mig eða ekki. En hún hefur ekki rétt á því að vera þjóðkirkja ef hún ætlar ekki að virða jafnrétti samfélagsins. Hún á ekki heldur að koma í veg fyrir það eins og hún gerir að önnur trúfélög fái heimild til þess að gifta samkynhneigða. Með því er kirkjan enn og aftur að hefta trúfrelsi í landinu. En trúfrelsi og félagafrelsi er bundið í stjórnarskrá ásamt jafnræðisreglu...

En þessi kirkja er hafin yfir lög...